Улстөр нийгэм
Дэд сайд Г.Ганбаяр Ховд, Баян-Өлгий аймагт ажиллав
Монгол Улсын Их Хурлын дарга Г.Занданшатар Ховд аймагт ажиллалаа. Ажлын хэсэгт Боловсрол, шинжлэх ухааны дэд сайд Г.Ганбаяр багтсан бөгөөд Ховд аймгийн Жаргалант сумын зарим цэцэрлэг, ерөнхий боловсрол, их сургуулийн үйл ажиллагаа, хөрөнгө оруулалтын ажлын явцтай газар нь дээр танилцав.
Жаргалант суманд баригдаж буй “Цаст-Алтай” сургуулийн 640 хүүхдийн суудал бүхий өргөтгөлийн барилга, 10 дугаар цэцэрлэгийн 100 хүүхдийн ор бүхий өргөтгөлийн барилгын гүйцэтгэгч компаниудтай БШУ-ы дэд сайд Г.Ганбаяр уулзаж, аль болох хугацаанаас өмнө ашиглалтад өгөхийн тулд шуурхай ажиллахыг хүслээ.
Тус аймгийн хувьд 2-5 насны 8647 хүүхэд байгаа бөгөөд энэ хичээлийн жилд өнөөдрийн байдлаар 6145 хүүхэд цэцэрлэгээр хүмүүжиж байгааг наймдугаар цэцэрлэгийн үйл ажиллагаатай танилцах үеэр БСУГ-ын дарга танилцуулж байна. Хэрвээ наймдугаар цэцэрлэгийн өргөтгөлийн барилгыг яаралтай шийдвэрлэж чадвал хамран сургалт улам сайжрах ажээ.
Ховд аймгийн ерөнхий боловсролын 25 сургууль, насан туршийн боловсролын 2 төвд нийт 1838 багш, ажиллагсад ажиллаж, 20200 суралцагч суралцаж байна. Хөдөөгийн ард иргэдийн хүүхдийг сурч боловсрох орчин нөхцөлийг бүрдүүлж 17 сумын 21 дотуур байранд 1816 хүүхэд амьдарч, 176 багш, ажилтан ажиллаж байгаа талаар БСУГ-ын хамт олонтой уулзах үеэр танилцуулж байна.
Дэд сайд Г.Ганбаяр Ховд их сургуулийн сургалтын үйл ажиллагаатай танилцаж, дээд боловсрол болон орон нутгийн их, дээд сургуулиудын талаар яамнаас баримталж буй бодлого чиглэлийн талаар мэдээлэл өглөө. Тус сургуулийн захирал Б.Нямдорж Ховд их сургууль болон Баян-Өлгий аймаг дахь салбар сургуулийнхаа сургалт, эрдэм шинжилгээ, эдийн засгийн өнөөгийн байдал, тулгамдаж буй асуудлуудаа танилцуулав.
Үргэлжлүүлэн Баян-Өлгий аймагт ажиллаж, Улсын Их Хурлын дарга Г.Занданшатарын хамт Өлгий сумын 7 дугаар цэцэрлэг, 7 дугаар бага сургууль, бүрэн дунд боловсролын 5 дугаар сургууль, Толбо сумын сургуулийн үйл ажиллагаатай танилцав. Өлгий сумын бага сургууль, цэцэрлэг нь аж ахуйн аргаар барьсан байртай бол 5 дугаар сургууль зориулалтын бус байранд үйл ажиллагаа явуулдаг юм байна. Тиймээс шинэ байр, өргөтгөл барьж өгөх хөрөнгийг төсөвт суулгаж өгөхийг хүсч байлаа.
Баян-Өлгий аймагт энэ хичээлийн жилд төрийн болон төрийн бус өмчийн 44 сургууль, 50 цэцэрлэг үйл ажиллагаа явуулж байгаа юм гэж Боловсрол, шинжлэх ухааны яамнаас мэдээллээ.
Улстөр нийгэм
Орон сууцны үнэ өссөн байна
Орон сууцны үнийн индекс есдүгээр сард 1.34 болж, өмнөх оны мөн үеэс 14.0 хувиар, өмнөх сараас 1.1 хувиар тус тус өссөн байна.
Шинэ орон сууцны үнэ өмнөх оны мөн үеэс 13.5 хувиар, өмнөх сараас 1.1 хувиар, хуучин орон сууцны үнэ өмнөх оны мөн үеэс 14.7 хувиар, өмнөх сараас 1.3 хувиар тус тус өссөн байна гэж Үндэсний Статистикийн Хорооноос мэдээллээ.
Улстөр нийгэм
Нийслэлийн хэмжээнд 2025 оны II ээлжийн цэрэг татлагыг энэ сарын 17, 18, 19-ний өдөр зохион байгуулна
Нийслэлийн хэмжээнд 2025 оны II ээлжийн цэрэг татлагыг энэ сарын 17, 18, 19-ний өдөр зохион байгуулна. Мөн хугацаат цэргийн албанд тэнцсэн залуусаас санал авч мэргэжил эзэмшүүлнэ.
Тодруулбал, барилгын засал, сантехникч, цахилгаанчин, гагнуурчин, үсчин, оёдолчин зэрэг мэргэжлийг эзэмших боломжтой. Харин тухайн мэргэжлээрээ ажиллаж байсан бол ахисан шатны сургалтад хамруулах аж.
Энэ талаар НЗДТГ-ын Цэргийн штабын дарга Г.Ялалт “Өмнөх жилүүдэд цэргийн алба хааж буй залууст англи хэл, жолооны курсийн сургалтыг цэргийн эрдмийн хичээлтэй хавсарч олгосон нь үр дүнтэй байсан. Тийм учраас цэргийн алба хаах хугацаанд нь тухайн орон нутгийн МСҮТ-тэй хамтарч мэргэжил эзэмшүүлнэ.
Ингэхдээ цэргийн албанд тэнцсэн залуусаас ямар мэргэжлээр суралцах хүсэлтэй байгаа талаар нь санал авна. Мөн цэргийн насны залуусын эрүүл мэндийн асуудалд ямар түвшинд байгааг тогтоох дүн шинжилгээ хийнэ. Энэ хүрээнд БЗД-ийн хэмжээнд цэрэгт татагдах насны 2000 иргэнийг эрүүл мэндийн цогц шинжилгээнд хамруулна. Хугацаат цэргийн албанд татагдагч нь найман төрлийн шинжилгээ хийлгэж, эрүүл мэндийн үзлэгт орно” гэлээ.
Цэрэг татлагын байранд очихдоо:
- Иргэний үнэмлэх
- Цэргийн үүрэгтний үнэмлэх
- Мэргэжил эзэмшсэн бол мэргэжлийн үнэмлэх
- Сургууль төгссөн бол диплом зэрэг бичиг баримтыг биедээ авч очих шаардлагатай.
Цэцэг татлагыг дараах есөн байршилд зохион байгуулна.
- Баянгол дүүргийн 96 дугаар сургууль,
- Баянзүрх дүүргийн - 14 дугаар сургууль,
- Сүхбаатар дүүргийн - 3 дугаар сургууль,
- Сонгинохайрхан дүүргийн - 83 дугаар сургууль,
- Чингэлтэй дүүргийн - 5 дугаар сургууль,
- Хан-Уул дүүргийн - 34 дугаар сургууль,
- Налайх дүүргийн - Налайх политехник коллеж,
- Багануур дүүргийн - Гүн галуутай цогцолбор сургууль,
- Багахангай дүүргийн - Хангай цогцолбор сургууль дээр тус тус зохион байгуулна.
Улстөр нийгэм
Санхүүгийн хууль бус үйлдлээс иргэдийг хамгаалахад чиглэсэн шинэ шатны хяналт орон нутагт хэрэгжинэ
Сүүлийн жилүүдэд зохих зөвшөөрөлгүйгээр санхүүгийн үйлчилгээ үзүүлэх, иргэдийг залилсан санхүүгийн гэмт хэрэг нэмэгдэх болсон. Иймд Санхүүгийн зохицуулах хороо иргэд, хөрөнгө оруулагч, үйлчлүүлэгчдийн эрх ашгийг хамгаалах, санхүүгийн зах зээлийн ил тод, хариуцлагатай орчныг бүрдүүлэх, тэр дундаа орон нутагт хууль бус санхүүгийн үйл ажиллагааг илрүүлэх, таслан зогсоох зорилгоор 21 аймгийн Засаг даргын Тамгын газрын Санхүү, төрийн сангийн хэлтсийн дарга болон бүртгэлийн мэргэжилтнүүдэд улсын байцаагчийн эрх олгохоор шийдвэрлэлээ.
Ингэснээр санхүүгийн хяналтыг орон нутагт сайжруулж, иргэдийн эрх ашиг бодитойгоор хамгаалагдах, хууль бус үйл ажиллагаанд өртөх эрсдэлээс сэргийлэгдэх боломж бүрдэхийн зэрэгцээ санхүүгийн бүтээгдэхүүн, үйлчилгээ үзүүлэгчдийн хууль, эрх зүйн орчинд ажиллах, хариуцлага нэмэгдэх давуу талтай. Мөн иргэдэд зориулсан мэдээлэл, сэрэмжлүүлэг, сургалт, зөвлөгөө өгөх үйл ажиллагаа илүү хүртээмжтэй, бодитой болох, санхүүгийн зах зээлийн тогтвортой байдал, хөрөнгө оруулагчдын итгэл бэхжих давуу талтай.
Энэ хүрээнд Санхүүгийн зохицуулах хорооноос санаачлан Улсын ерөнхий прокурорын газар, Цагдаагийн ерөнхий газартай хамтран улсын байцаагчийн эрхтэй 21 аймгийн Засаг даргын Тамгын газрын Санхүү, төрийн сангийн хэлтсийн дарга, бүртгэлийн мэргэжилтнүүдэд улсын байцаагчийн эрх зүйн байдал, зөрчлийн хэрэг маргаан болон зөрчил шалган шийдвэрлэх ажиллагаатай холбоотой чиглүүлэх, мэдээлэл өгөх сургалт зохион байгууллаа. Ингэснээр эдгээр улсын байцаагч холбогдох хууль тогтоомж, хяналт шалгалт, гарсан зөрчлийг хууль зүйн үндэслэлтэй, үр дүнтэй хэрэгжүүлэх чадамжаар хангагдах, орон нутгийн түвшинд хууль бус санхүүгийн үйл ажиллагаатай шуурхай тэмцэх нөхцөл бүрдэх юм.
Санхүүгийн зохицуулах хороо цаашид ч улсын байцаагч нартай байнга хамтран ажиллаж, мэргэжлийн чадавхыг нь нэмэгдүүлэх, хууль бус санхүүгийн үйл ажиллагаатай тэмцэх ажлыг шат дараатайгаар хэрэгжүүлнэ гэж Санхүүгийн зохицуулах хорооноос мэдээллээ.
