Бидэнтэй нэгдэх

Цаг үе

“Туркиш Эйрлайнс” Европ-Зүүн өмнөд Ази чиглэлийн багц аялалд Улаанбаатар хотыг оруулах санал тавилаа

Огноо:

4 жил 4 сар.өмнө

,

Байгаль орчин, аялал жуулчлалын сайд Б.Бат-Эрдэнэ дотоод, гадаадын авиа компанийн төлөөллүүдтэй цуврал уулзалт хийж байгаа. Тэрбээр Дэд сайд Г.Түвдэндорж, Аялал жуулчлалын бодлого зохицуулалтын газрын даргын үүргийг түр орлон гүйцэтгэгч А.Энхбат, Аялал жуулчлалын хөгжлийн төвийн захирал С.Бат-Эрдэнэ нарын хамт “Туркиш Эйрлайнс” компанийн Монгол Улс дахь Төлөөлөгчийн газрын ерөнхий менежер Али Өздэмиртэй уулзсан юм.
 
Уулзалтын үеэр “Туркиш Эйрлайнс” компанийн төлөөлөгчийн газрын ерөнхий менежер Али Өздэмир танилцуулгадаа Хятад, Өмнөд Солонгос, Японоос Европ руу чиглэсэн, Европоос Зүүн өмнөд Ази руу чиглэсэн багц аяллын хөтөлбөрт Улаанбаатар хотыг оруулж болох талаар дурдав. Ингэснээр багц аяллаар яваа жуулчны зардал огцом нэмэгдэхгүйгээр аяллынхаа замд Улаанбаатар хотыг үзэх боломжтой болно гэдгийг хэлж байлаа.
 
Тухайлбал, Европ-Токио-Европ чиглэлийн жуулчны хоёр талын тасалбар 992 ам.доллар байдаг байна. Үүнийг Токио-Европ-Улаанбаатар-Токио болгож өөрчилбөл тухайн зардал 170 ам.доллараар нэмэгдэх аж. Сөүл-Европ-Сөүл аяллын хоёр талын тасалбар 1015 ам.доллар байдаг бол Сөүл-Европ-Улаанбаатар-Сөүл болон өөрчлөгдөхөд 70 ам.доллар нэмэгдэх тооцоо гаргажээ.
 
2019 оны судалгаагаар Хонконгоос гурван сая, Японоос зургаан сая, Хятадаас найман сая, Өмнөд Солонгосоос есөн сая жуулчин багц аяллын хүрээнд “Туркиш Эйрлайнс” компанийн нислэгээр Европ руу аялж байжээ. Тэгвэл мөн тэр жил Европоос Хонконг руу хоёр сая, Япон руу хоёр сая, Хятад руу долоон сая, Өмнөд Солонгос руу хоёр сая жуулчин очиж байсан байна. Тэгэхээр энэ эргэлтийн дунд Улаанбаатар хот нэмэгдсэнээр манайд ирэх жуулчдын тоо багагүй хэмжээгээр нэмэгдэх тэр дундаа өвөл, хавар жуулчин авах боломж бүрдэнэ гэдгийг “Туркиш Эйрлайнс” компанийн төлөөлөл хэлж байлаа.
 
“Туркиш Эйрлайнс” компанийн Монгол Улс дахь Төлөөлөгчийн газрын ерөнхий менежер Али Өздэмир “Жуулчдын аяллын хөтөлбөрт Улаанбаатар хотыг оруулаад, нислэгийг зардлыг огт нэмэхгүйгээр зохицуулалт хийсэн ч болно. Жуулчид өөрсдийнх нь зардал нэмэгдэхгүйгээр нэг хот илүү үзэх боломжтой болбол дуртайяа Улаанбаатарт ирнэ гэдэгт итгэлтэй байна. Улаанбаатар хот дахь “Үлэг гүрвэлийн музей”, “Түмэн их чуулга”, бөөгийн зан үйлийг үзэж сонирхож, Европын зах зээлээс харьцангүй хямд кашмерын бүтээгдэхүүнийг худалдан авах боломжтой болно. Энэ нь эргээд зөвхөн аялал жуулчлал бус бусад салбарт ч эдийн засгийн нөлөөгөө үзүүлэх юм. Хамгийн гол нь өвөл, хаврын улиралд Улаанбаатар хот жуулчинтай байх боломжтой. Жишээ нь, Европоос Өмнөд Солонгос руу 15 хоног аялахаар явж буй жуулчин замдаа гурав хоногийг нь Улаанбаатар хотод саатаж болно шүү дээ” гэж байлаа. Үүнтэй холбоотой тооцоо, судалгаа хийснээ ч танилцуулсан юм.
 
Мөн “Туркиш Эйрланс” компанийн зүгээс нислэгийн тоогоо нэмэгдүүлэх хүсэлтэй байгаагаа илэрхийллээ.
 
Өнөөгийн долоо хоногт гурван удаагийн нислэгээр 800 суудлаар хязгаарлаж буй нь жуулчид нөхцөлийг хааж байна гэдгийг хэлж байв. “Туркиш Эйрлайнс” компанийн хувьд жилийн турш өдөр бүр нислэг, тэр дундаа зуны улиралд өдөрт 3-4 удаа нислэг хийх эрэлт, боломж бийг дуулгасан юм. Үүний тулд Монгол Улс агаарын тээврээ либералчлах хэрэгтэйг онцоллоо.
 
“Туркиш Эйрлайнс” компанийн төлөөлөгчийн газрын ерөнхий менежер Али Өздэмир агаарын тээврийг либералчилснаар нисэхийн салбараа хөгжүүлсэн нэг жишээ бол “Туркиш Эйрлайнс” компанийн түүх гээд “Одоогоос 15-20 жилийн өмнө Туркиш Эйрлайнс мөн л бусад авиа компанид саад хийдэг, чөлөөт нислэгийг хориглохын төлөө байдаг байсан. Тухайн үед манай компани одоогийнхоосоо тав дахин бага онгоцтой, нислэгийн тасалбар маш үнэтэй, жилдээ 3-5 сая жуулчин хүлээж авдаг байлаа. Хувьчлагдсаны дараагаас өөр авиа компаниуд манай зах зээлд орж ирсэн. Жуулчид нэмэгдэж, эдийн засаг ч тэлсэн. Зүйрлэвэл, нэг дэлгүүр байлаа гэхэд үйлчлүүлэгчид нь өмнөх хэвээрээ харин тойроод бусад дэлгүүрүүд ажиллах боломжтой болсон гэсэн үг. Товчхондоо, зах зээл томорсон. Нислэгийн зардал буурснаар жилдээ 60 сая жуулчин авдаг болсон. Өмнө нь ашиггүй ажилладаг компани байсан бол орлого олдог, дээгүүр эрэмблэгддэг томоохон компани болсон. Хувьчлалын ачаар манай агаарын тээвэр томорсон юм. Энэ салбарын хүний хувьд хэлэхэд одоо хүмүүс далайг харах гэж биш нүүдлийн соёлыг харахыг хүсэж байгаа. Тиймээс хэрэв Монгол Улсын агаарын тээвэр чөлөөтэй болбол богино хугацаанд олон жуулчин авна гэдэгт итгэлтэй байна” гэсэн юм.
 
Байгаль орчин, аялал жуулчлалын сайд Б.Бат-Эрдэнэ хэлсэн үгэндээ “Агаарын тээврийн салбарыг либералчлах нь манай улсад ирэх жуулчдын тоог нэмэгдүүлэх суурь нөхцөл гэдэгтэй санал нэг байна. Жуулчин ихээр ирж байж эдийн засаг тэлнэ. Аялал жуулчлалын салбар, авиа компаниудын төлөөлөлтэй цувралаар уулзаж байхад энэ асуудал олон удаа хөндөгдөж байна. Та бүхэн ч гэсэн өөрсдөдөө байгаа судалгаа, тооцоогоо манай яаманд хүргүүлээрэй” гэв.
 
 
Уншсан:2072
Дэлгэрэнгүй унших
АНХААРУУЛГА: УИХ-ын 2024 оны ээлжит сонгуулийн хуулийн холбогдох заалтын хүрээнд тус сайтын сэтгэгдэл хэсгийг түр хугацаанд хаасан болно.

Цаг үе

БНХАУ-ын Онцгой байдлын удирдлагын яамтай дэвшилтэт технологи, тоног төхөөрөмжийн чиглэлээр хамтран ажиллана

Огноо:

1 өдрийн өмнө

,

Монгол Улсын Шадар сайд Н.Номтойбаяр БНХАУ-д хийж байгаа ажлын айлчлалын хүрээнд Онцгой байдлын удирдлагын сайд Жан Чэнжунтай албан уулзалт хийлээ.

Уулзалтаар Шадар сайд Н.Номтойбаяр хоёр улсын Онцгой байдлын салбар гамшгаас урьдчилан сэргийлэх чиглэлээр 2021 онд Гамшигтай тэмцэх санамж бичиг, 2022 онд Хил орчмын ой хээрийн түймэртэй тэмцэх хэлэлцээрийг тус тус байгуулсан бөгөөд уг гэрээ хэлцлийг шинэ түвшинд гаргах нь чухал гэдгийг онцлов. Тодруулбал, Хятадын баруун хойд хязгаартай хиллэдэг Монгол Улсын баруун бүс нутагт газар хөдлөлтийн давтамж нэмэгдэж буй, зүүн хязгаар бүсэд хуурайшилтын улмаас ой хээрийн түймрийн давтамж их байгаа тул учраас хил орчмын бүс нутагт хоёр орны онцгой байдлын хамтын ажиллагааг идэвхтэй өрнүүлэх шаардлагатай байгааг тодотголоо.

Түүнчлэн гамшгаас урьдчилан сэргийлэх, гамшигтай тэмцэхэд ашиглаж буй Хятадын дэвшилтэт технологи, тоног төхөөрөмж, хиймэл оюун ухаан, сансрын технологийн ашиглалт зэргийг судалж, худалдан авах талаар Шадар сайд Н.Номтойбаяр онцолж байна.

Тэрбээр, БНХАУ-ын Ус, цаг уурын орчны хүрээлэнд хэрэглэж буй гамшгийн мэдээллийн систем, радар болон онцгой байдлын салбарт ашиглаж буй дэвшилтэт, орчин үеийн технологи, тоног төхөөрөмжийг манай улс нэвтрүүлснээр бүс нутгийн хэмжээнд гамшгаас хамгаалах нөхцөл бүрдэнэ гэв. Мөн онцгой байдал, ус, цаг уурын алба хаагчдыг БНХАУ-д чадавхжуулах, сургах, удирдлага менежментийн арга барилыг мэргэжлийн түвшинд бэлтгэх чиглэлээр санал дэвшүүллээ. 

БНХАУ-ын Онцгой байдлын удирдлагын сайд Жан хоёр улсын онцгой байдлын салбарын хамтын ажиллагааг Монгол Улс, БНХАУ-ын иж бүрэн стратегийн түншлэлийн харилцааны гол амжилтын нэг нь болгохыг хүсэж буйгаа онцлон тэмдэглэлээ.

Тэрбээр, Хятад Улс гамшигтай тэмцэх, гамшиг бууруулах, аюулгүй үйлдвэрлэл болон аврах ажиллагааны хөтөлбөрийн дагуу өнгөрсөн хугацаанд улсын хэмжээнд гамшиг, ослын тоо, гарз хохирол 36-39 хувиар буурсан бөгөөд Монгол Улстай хил орчмын бүс нутгийн гамшгаас урьдчилан сэргийлэх, гамшгаас хамгаалах чиглэлээр ажиллах бүрэн боломжтой хэмээв.

Хоёр орны онцгой байдлын салбарт хамтын ажиллагаагаар хэрэгжүүлэх нэгдсэн үйл ажиллагааны хөтөлбөрийг нэн даруй боловсруулж, хэрэгжүүлэх ажлын жагсаалт гарган хамтран ажиллах талаар санал солилцлоо.

Мөн аврах ажиллагаа, дроны сургалт явуулах, Монгол Улсын онцгой байдлын алба хаагчдад гамшгаас хамгаалах, урьдчилан сэргийлэх чиглэлээр өөрсдийн ашиглаж буй дэвшилтэт технологи, тоног төхөөрөмжүүдийг танилцуулах, сургалт явуулахад хамтран ажиллаж, харилцаагаа өргөжүүлэхэд бэлэн байгаагаа илэрхийлэв. 

Дэлгэрэнгүй унших

Цаг үе

Өвчтэй болон үхсэн шувуунд хүрэхгүй байхыг зөвлөж байна

Огноо:

2 өдрийн өмнө

,

Шувууны томуу нь хүн болон амьтны эрүүл мэндэд эрсдэл учруулж болзошгүй халдварт өвчин юм.

Иргэн бүр эрсдэлээс урьдчилан сэргийлж, халдвар хамгааллын дэглэмээ мөрдөх нь чухал.

-Өвчтэй болон үхсэн шувуунд хүрэхгүй байх

-Эрсдэлтэй бүс нутагт зорчихоос зайлсхийх

-Шувууны гаралтай түүхий бүтээгдэхүүнтэй харьцсаны дараа гараа сайтар угаах

-Шувууны аж ахуй, худалдааны газраар шаардлагагүй тохиолдолд зорчихгүй байхыг ЗӨСҮТ-өөс мэдээллээ.   

Дэлгэрэнгүй унших

Цаг үе

Орон сууц захиалгын гэрээтэй холбоотой 174 хэрэгт мөрдөн шалгах ажиллагаа явагдаж байна

Огноо:

2 өдрийн өмнө

,

Улсын хэмжээнд энэ төрлийн 174 хэрэг бүртгэгдэн шалгагдаж байгаагийн 163 буюу 93.7 хувь нь Нийслэл, дүүргийн, 11 буюу 6.3 хувь нь орон нутгийн прокурорын газрын хяналтад тус тус шалгагдаж байна.

Мөрдөн байцаалтын шатанд шалгагдаж байгаа 32 хэрэгт 1,283 хүнийг хохирогчоор тогтоож, 52 хүнийг яллагдагчаар татаж, 545,5 сая төгрөгийн хохирлыг нөхөн төлүүлж, мөн хохирол нөхөн төлүүлэх зорилгоор 7,2 тэрбум төгрөгийн үнийн дүн бүхий хөрөнгийн шилжилт хөдөлгөөнийг хязгаарлаж, 490 сая төгрөгийн үнийн дүн бүхий эд хөрөнгийг битүүмжлэх арга хэмжээ аваад байна.

Хэргийн 93.7 хувь нь Нийслэлийн нутаг дэвсгэрт шалгагдаж байгаатай холбогдуулан Нийслэлийн прокурорын газраас ажлын хэсэг байгуулж, хэргүүдийг шуурхай шалгаж шийдвэрлэх чиглэлээр прокурор болон мөрдөн шалгах ажиллагаа явуулах эрх бүхий байгууллагуудтай хамтран ажиллахаар болжээ.

Тодруулахад, 2024-2026 онуудад орон сууц худалдах, худалдан авах, түрээслэх нэрийдлээр бусдыг залилсантай холбоотой хэрэгт 10 тэрбум төгрөгийн хохирлыг нөхөн төлүүлж, 44,6 тэрбум төгрөгийн хөрөнгийн шилжилт хөдөлгөөнийг хязгаарлах арга хэмжээ авч, 227,8 сая төгрөгийн эд хөрөнгийг битүүмжилж хөрөнгө хамгаалах арга хэмжээ авсан байна.

Мөн 170 хэрэгт 3,651 хүнийг хохирогчоор тогтоож, 301 хүнийг яллагдагчаар татаж прокуророос яллах дүгнэлт үйлдэж, хэргийг шүүхэд шилжүүлж шийдвэрлэжээ.

Дэлгэрэнгүй унших

Санал болгох