Шударга мэдээ
Монголын шилдэг эмэгтэйчүүдийг шалгарууллаа
Монголын Эмэгтэйчүүдийн Холбоо энэ жил оны шилдэг эмэгтэйчүүдийг шалгаруулах "Алунгоо-2019" ёслолын арга хэмжээгээ “Архигүй баярын ширээ” уриатайгаар УДЭТ-т 12 дугаар сарын 21-ний өдөр зохион байгууллаа.
“Алунгоо” шагналтнаар дамжуулан жендэрийн эрх тэгш байдлыг хангах үйлсийг дэмжин сурталчлах, охид, эмэгтэйчүүдэд улс төр, эдийн засаг, нийгмийн эрх тэгш боломж олгох, улмаар дэлхий даяар тунхагласан Тогтвортой хөгжлийн зорилтуудыг хангахад бодитой түлхэц болгох, тухайн асуудлуудыг нийгэмд таниулах зорилготой. Ирэх 2020 онд МЭХ эмэгтэйчүүдийн эрхийг хамгаалахаар чиглэлээр нийгэмд тулгарсан хэд хэдэн асуудалд төвлөрч ажиллахын зэрэгцээ архи, архидалттай тэмцэхэд олон нийтийг уриалж, тууштай ажиллана гэж МЭХ-ны тэргүүн Б.Оюунгэрэл мэдэгдлээ.
2019 оны АЛАНГОО ЦОМЫН ЭЗЭД:
- Оны малчин эмэгтэй Хэнтий аймгийн Баянмөнх сумын 3-р багийн малчин Д.Оюунчимэг
- Хөдөө аж ахуй, газар тариалангийн салбарын оны эмэгтэй Сэлэнгэ аймгийн Алтанбулаг сумын тариаланч Ё.Саранцэцэг
- Боловсролын салбарын оны эмэгтэй Мандах их сургуулийн захирал Г.Нанжид
- Эрүүл мэндийн салбарын оны эмэгтэй ХСҮТ-ийн сувилахуйн албаны арга зүйч П.Долгорсүрэн
- Шинжлэх ухаан, инновацийн салбарын оны эмэгтэй "Гэрэгэ” системийг санаачлагч, ICG группийн гүйцэтгэх захирал Н.Энхжаргал
- Соёл, урлагийн салбарын оны эмэгтэй МУСТА, жүжигчин Г.Ундармаа
- Спортын салбарын оны эмэгтэй ОУХМ, Дэлхийн цомын эзэн М.Анхцэцэг
- Иргэний нийгэм, хүмүүнлэгийн байгууллагын оны эмэгтэй Ид шидийн орон хүүхэд хамгааллын төвийн ерөнхий зохицуулагч, сэтгэл зүйч Б.Аззаяа
- Бизнес эрхлэгч оны эмэгтэй /худалдаа үйлчилгээ, нийтийн аж ахуй/ Монос Косметик ХХК-ийн ТУЗ-ийн дарга Х.Солонго
- Банк санхүүгийн салбарын оны эмэгтэй ХХБ-ны гүйцэтгэх захирлын орлогч Б.Баярмаа
- Жижиг дунд үйлдвэрлэлийн салбарын оны эмэгтэй Lhamour брэндийн үүсгэн байгуулагч Д.Хулан
- Хүнд үйлдвэр, дэд бүтцийн салбарын оны эмэгтэй “Кэй Эйч Ти Эс” ХХК-ийн захирал, Авто замын мэргэшсэн инженер М.Цэцгээ
- Хүнс, хөнгөн үйлдвэрлэлийн салбарын оны эмэгтэй “Глори Кинг Инвесимент Групп” ХХК-ийг үүсгэн байгуулагч Х.Удвалцэцэг
Мөн тус арга хэмжээний үеэр ажил хөдөлмөр, үйлс бүтээлээрээ манлайлж буй шилдэг залуусын төлөөлөл Монгол Улсын гавьяат жүжигчин балетчин Д.Алтанхуяг, битбокс урлагийг хөгжүүлж буй Рэй буюу Б.Нарандэлгэр, залуу дуучин С.Гантогоо нар Монголын Эмэгтэйчүүдийн Холбооны “Соёлыг түгээгч элч” болж буйг танилцуулж, батламж гардууллаа.
Соёлыг түгээгчид нийгмийн хариуцлагын хүрээнд өсвөр үеийнхэнд зөв үлгэр дуурайл үзүүлэх, манлайллыг бий болгох, МЭХ-ноос санаачлан зохион байгуулж буй нийгмийн сайн сайхны төлөөх нөлөөллийн арга хэмжээг дэмжин, хамтарч ажиллах юм байна.
"Алунгоо-2019" ёслолын арга хэмжээний төгсгөлд МЭХ-ны анхны даргаар ажиллаж байсан их зохиолч Дашдоржийн Нацагдоржийн гэргий Дамдины Пагмадуламын амьдрал, намтраас сэдэвлэсэн "Жаргаагүй нар" түүхэн жүжгийг зочиддоо толилууллаа.
Ийнхүү Монголын шилдэг эмэгтэйчүүдийг шалгаруулах “Алунгоо-2019” ёслолын арга хэмжээг архи дарсгүй, тоглолт, жүжгийн цэнгүүнтэй зохион байгуулсанд ёслолд оролцсон эмэгтэйчүүд оюундаа хөрөнгө оруулсан, олон нийтэд зөв үлгэрлэсэн арга хэмжээ байлаа хэмээн талархан хүлээн авч байв.
Шударга мэдээ
Энэ сарын 20-ны өдрөөс эхлэн нийслэлийн төр, захиргааны байгууллагын албан хаагчид нэг өдөр цахимаар ажиллана
Монгол Улсын Засгийн газрын 2026 оны 4 дүгээр сарын 8-ны өдрийн ээлжит хуралдаанаар төрийн албан хаагчдыг уян хатан цагийн хуваариар ажиллах, нэг өдрийг цахимаар ажиллуулахаар шийдвэрлэсэн. Энэ хүрээнд нийслэлийн Засаг даргын А/564 тоот захирамжаар нийслэлд байршин үйл ажиллагаа явуулдаг яам, Засгийн газрын агентлаг, тэдгээрийн харьяа байгууллага, нийслэлийн нутгийн захиргааны байгууллагууд болон тэдгээрийн харьяа байгууллагуудын ажил эхлэх цагийг 07:00-08:30, дуусах цагийг 16:00-17:30 цагийн хооронд уян хатан байхаар шийдвэрлэлээ.
Мөн төрийн байгууллагын үйл ажиллагааны хэвийн, тасралтгүй, шуурхай байдлыг алдагдуулахгүйгээр ажлын зайлшгүй шаардлагаас бусад тохиолдолд нийслэлийн төр, захиргааны байгууллагын албан хаагчид 2026 оны 4 дүгээр сарын 20-ны өдрөөс долоо хоногийн нэг өдөр зайнаас цахимаар ажиллана.
НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС
Шударга мэдээ
"Улаанбаатар трам" төслийн нэгдүгээр шугам Сэлбэ дэд төвийг дамжин өнгөрнө
Нийслэлд их багтаамжийн нийтийн тээврийн шинэ шийдэл болох “Улаанбаатар трам” төслийг хэрэгжүүлж буй. Төслийн нэгдүгээр шугам буюу Зуслангийн бүс “Зунжин худалдааны төв”-өөс Сүхбаатарын талбай орох трасс нь Сэлбэ дэд төвийг дамжин өнгөрөх юм. Энэ нь зөвхөн тээврийн шинэ шугам болохоос гадна хот байгуулалтын цогц хөгжлийг дэмжих ач холбогдолтой.
Улаанбаатар хотын 2040 он хүртэлх хөгжлийн ерөнхий төлөвлөгөөнд Сүхбаатар, Чингэлтэй дүүргийн хүн ам 312 мянгад хүрч 20 хувиар өснө. Ажлын байр 60 мянгад хүрч 11 хувиар нэмэгдэж, худалдаа үйлчилгээний барилгажилт 3.90 сая ам метр хүрэх төлөвтэй хэмээн тусгагджээ. Тиймээс Улаанбаатар хотын төвлөрлийг сааруулж, хүн амын нягтралыг тэнцвэржүүлэх зорилгоор Сэлбэ дэд төвийг байгуулж, орон сууц, худалдаа үйлчилгээ, нийгмийн дэд бүтэц хосолсон орчин үеийн хотын шинэ зангилаа болгохоор төслийг хэрэгжүүлж байна. Өнөөдрийн байдлаар Сэлбэ дэд төвийн хүрээнд “Сэлбэ 20 минутын хот” төслийг хэрэгжүүлж, 80 техник 1632 мэргэжилтэн барилгын талбайд ажиллаж байна.
Трамвайн шугам Сэлбэ дэд төвөөр дамжин өнгөрснөөр иргэдийг төв рүү чиглэсэн автомашины хөдөлгөөнөөс хамаарал багатай, тав тухтай, тогтвортой нийтийн тээврийн сүлжээнд холбох нөхцөл бүрдэнэ. Ингэснээр Улаанбаатар хотын тээвэр, хот төлөвлөлтийн бодлого уялдаж, Сэлбэ дэд төвийг түшиглэсэн орчин үеийн, тогтвортой хөгжлийн шинэ жишиг болох юм. Зунжингаас Сүхбаатарын талбай хүртэл автобусаар явахад өнөөдрийн байдлаар 90 минут зарцуулдаг бол трамвайг ашигласнаар 29 минутад туулна. Үүний үр дүнд тээврийн хэрэгслийн түлш, бензин ашиглалтын зардал буурч, замын түгжрэл багасах зэрэг олон давуу талтай.
“Улаанбаатар трам” төслийн нэгдүгээр шугам нь Зуслангийн бүс “Зунжин худалдааны төв”-өөс Сүхбаатарын талбай хүртэлх чиглэлд нийт 11 км урт, 16 зогсоолтой байна. “Сэлбэ 20 минутын хот” төслөөр нийт 8565 өрхийн 113 блок орон сууц, гурван сургууль, таван цэцэрлэг, эмнэлэг, спорт байгууламж зэргийг барина.
Шударга мэдээ
Аж ахуйн нэгж, байгууллагын тооллогыг цахимаар зохион байгуулна
Аж ахуйн нэгж, байгууллагын 2026 оны тооллого улсын хэмжээнд бүртгэлд суурилсан аргаар буюу төрийн байгууллагуудад бүртгэлтэй мэдээлэлд үндэслэн 2026 оны дөрөвдүгээр сарын 15-наас 2026 оны тавдугаар сарын 15-ны өдрийг дуустал цахимаар зохион байгуулагдана. Аж ахуйн нэгж, байгууллагууд www.2026.mn цахим хуудсаар нэвтэрч, шаардлагатай нэмэлт асуултад хариулснаар тооллогын мэдээллээ баталгаажуулах юм.
Аж ахуйн нэгж, байгууллагын тооллогод Монгол Улсын нутаг дэвсгэрт үйл ажиллагаа явуулахаар бүртгүүлсэн өмчийн бүх төрөлд хамаарагдах хуулийн этгээд, хувиараа хөдөлмөр эрхлэгчдийг хамруулж, улс орны эдийн засаг, нийгмийн хөгжилд оруулж байгаа хувь нэмрийг бодитоор тодорхойлох, эдийн засгийн хөгжлийн чиг хандлага, бүтэц үзүүлэлтийг тооцох, салбарын бодлого төлөвлөлт, хэрэгжилтийг үнэлэх, дүн шинжилгээ хийх, бизнес эрхлэгчдийн төвлөрөл, байршил, үйл ажиллагааны чиглэлд үндэслэн төр засгийн бодлого, хөтөлбөрийг боловсруулах зэрэг олон талын ач холбогдолтой.
Аж ахуйн нэгж, байгууллагын ээлжит тооллогодоо идэвхтэй хамрагдахыг уриалж байна.
НИЙСЛЭЛИЙН СТАТИСТИКИЙН ГАЗАР
