Шударга мэдээ
Гурван улсын бизнесмэнүүд Манжуур хотод чууллаа
Монгол, Орос, Хятадын бизнес эрхлэгчдийн анхдугаар форум энэ сарын 10-12-нд Манжуур хотод болж өндөрлөлөө. БНХАУ-ын “Бүс ба зам” санаачилгын хүрээнд гурван улсын нутаг дэвсгэрийг хамарсан эдийн засгийн коридор байгуулах ажлыг түргэтгэх, бүс нутгийн хөгжлийг дэмжих, аялал жуулчлалын урсгалыг нэмэгдүүлэх, биенесийн шинэ боломжийг нээх зорилготой энэхүү форумд 500 гаруй төлөөлөгч оролцож дуу хоолойгоо өргөв. Монголын талаас Дорнод, Орхон, Хөвсгөл аймгийн төлөөлөл урилгаар оролцлоо. Форумыг БНХАУ-ын Худалдааны яам, ӨМӨЗО-ы засаг захиргаа, Манжуур хотын удирдлага зохион байгуулсан бөгөөд ОХУ-ын Өвөр байгаль, Буриадын Засгийн газрын өндөр төвшний зочид хүрэлцэн ирсэн юм.
Энэ онд Монгол Улс БНХАУ-тай дипломат харилцаа тогтоосны 70 жилийн ой тохиож буй. Энэ хүрээнд Өвөр Монголын Манжуур хот хөрш зэргэлдээ Дорнод аймгаас гадна Орхон, Хөвсгөл аймагтай харилцаа тогтоож, хамтран ажиллаж эхэлжээ. 300 орчим мянган хүн амтай хэрнээ жилд 8 сая жуулчин авдаг Манжуур хот Орос, Монголын биенес эрхлэгчидтэй хамтран төсөл хэрэгжүүлж, харилцан ашигтай хамтран ажиллах сонирхолтой байгаагаа энэ үеэр илэрхийлж байв. БНХАУ-ын Засгийн газраас биенесийн тогтвортой орчин бүрдүүлэх чиглэлээр онцгой анхаарч, Гадаадын хөрөнгө оруулалтын тухай хууль батлахаар ажиллаж байгаа ажээ.
Аялал жуулчлал, бараа солилцоо гэх уламжлалт тогтсон биенесээс гадна эрүүл мэндийн аялал жуулчлал, инновацид суурилсан цоо шинэ биенесийг Монгол, Орос, Хятадын аж ахуйн нэгжүүд хамтран хэрэгжүүлбэл бүс нутгийн хөгжилд томоохон түлхэц болно гэдгийг албаны хүмүүс онцолж байв. Гурван улсын шинжлэх ухаан, технологийн 16 дахь удаагийн үзэсгэлэн худалдаа энэ үеэр Манжуурт нээлтээ хийсэн бөгөөд туршлагатай, нэр хүндтэй томоохон аж ахуйн нэгжүүд бараа бүтээгдэхүүнээ дэлгэн үзүүллээ. Эрдэм шинжилгээний байгууллагууд, их дээд сургуулийн төлөөлөл олноор оролцсон нь энэ удаагийн экспогийн онцлог байлаа.
Монгол, Орос, Хятадын бизнес эрхлэгчдийн форумыг жил бүр уламлан зохион байгуулж байх санал дэмжигдсэн бөгөөд бүс нутгийн хотууд зохион байгуулалтыг нь хариуцахаар тогтлоо. Дараагийн форумыг ОХУ-ын Буриадад хийхээр талууд тохиролцжээ. Үүнээс гадна энэ удаагийн форумын төгсгөлд гурван улсын бизнес эрхлэгчид арав гаруй хамтран ажиллах төсөлд гарын үсэг зурж баталгаажуулсан нь бодит үр дүн болсныг зохион байгуулагчид онцолж байлаа. Бизнес эрхлэгчдэд харилцан ашигтай хамтран ажиллах зарчим нэн чухал боловч гурван улсын харилцаа, хөгжлийг түргэтгэхэд оруулж буй хувь нэмэр түүнээс ч чухал гэдэг дээр төлөөлөгчид санал нэгдсэн юм.
Шударга мэдээ
ЦЕГ: Гадаад улсын виз гаргуулахтай холбоотой 176 залилах гэмт хэрэг бүртгэгдэн шалгагдаж байна
Цагдаагийн байгууллагад 2026 он гарснаас хойш гадаад улсын виз гаргуулахтай холбоотой нийт 176 залилах гэмт хэрэг бүртгэгдэн шалгагдаж байгаагаас зөвхөн “Бүгд найрамдах Солонгос улсын виз гаргаж өгнө” гэж иргэдийг залилсан 102 хэрэгт мөрдөн шалгах ажиллагаа явуулж байгаа аж.
Монгол Улс, БНСУ-ын Засгийн газар хооронд байгуулсан хамтын ажиллагааны гэрээний хүрээнд БНСУ-д хөдөлмөрийн гэрээгээр ажиллах хүсэлтэй иргэдийг зөвхөн Хөдөлмөр, халамжийн үйлчилгээний ерөнхий газар албан ёсоор бүртгэж, сонгон шалгаруулалт зохион байгуулан илгээдэг.
Тус байгууллага нь Е-9 визийн ангиллаар БНСУ-ын аж үйлдвэрийн салбарт ажиллах иргэдийн солонгос хэлний түвшин тогтоох шалгалтын бүртгэл, сонгон шалгаруулалт, үр дүнгийн мэдээллийг албан ёсны сувгуудаар хүргэдэг бөгөөд энэ төрлийн үйл ажиллагааг хэрэгжүүлэх цорын ганц эрх бүхий байгууллага юм.
Хөдөлмөр, халамжийн үйлчилгээний ерөнхий газраас БНСУ-д хөдөлмөрийн гэрээгээр /Е-9 визийн ангилал/ аж үйлдвэрийн салбарт ажиллах хүсэлтэй иргэдийн солонгос хэлний түвшин тогтоох шалгалтын бүртгэлийг 2026 оны гуравдугаар сард зохион байгуулж эхэлсэн. Залилагч этгээдүүд "Хөдөлмөр, халамжийн үйлчилгээний ерөнхий газарт ажилладаг", "Найдвартай виз гаргаж өгнө", "Дараалал харгалзахгүй явуулна" гэх мэт худал мэдээлэл тараан иргэдийг хуурч, их хэмжээний мөнгө залилан авах гэмт хэрэг гарсаар байгаа аж.
Энэхүү гэмт хэрэг нь жил бүрийн хавар, намрын бүртгэлийн үеүдэд идэвхэжсэн юм байна. Иймд иргэд та бүхэн БНСУ-ын хөдөлмөрийн гэрээт ажилтны бүртгэл, шалгалттай холбоотой мэдээллийг зөвхөн албан ёсны эх сурвалжаас авах, танил талаар дамжуулан виз гаргаж өгнө, шалгалтгүй явуулна гэсэн амлалтад итгэхгүй байх, урьдчилгаа төлбөр, үйлчилгээний хураамж нэрээр мөнгө шилжүүлэхээс татгалзах, сэжигтэй зар мэдээлэл, залилангийн шинжтэй үйлдлийн талаар цагдаагийн байгууллагад нэн даруй мэдэгдэхийг зөвлөлөө.
Шударга мэдээ
Боловсролын зээлийн сангийн зээлээс 10.2 тэрбум төгрөг эргэн төлөгджээ
Улсын ерөнхий прокурорын газрын 2023 оны тавдугаар сарын 29-ний өдрийн тогтоолоор “Боловсрол, шинжлэх ухааны яамны харьяа Боловсролын зээлийн сангаас төрийн өндөр албан тушаалтнуудын хамаарал бүхий этгээдүүд хууль бусаар тэтгэлэг авч, эргэн төлөөгүй” гэх гэмт хэргийн талаарх мэдээллийг шалгах ажлын хэсэг байгуулсан байна.
Ажлын хэсгээс хэрэг бүртгэлтийн 11, мөрдөн байцаалтын 2 хэрэгт мөрдөн шалгах ажиллагаа явуулжээ. Үүнээс хэрэг бүртгэлтийн 1 хэргийг хааж, 1 хэргийг нэгтгэн, мөрдөн байцаалтын 1 хэрэгт яллах дүгнэлт үйлдэж, шүүхээр шийдвэрлүүлсэн байна.
Одоогоор Цагдаагийн ерөнхий газрын Эрүүгийн цагдаагийн албанд хэрэг бүртгэлтийн 1, Авлигатай тэмцэх газрын Мөрдөн шалгах хэлтэст 8 хэрэг шалгагдаж байгаа аж. Мөн яллах дүгнэлт үйлдүүлэх саналтай ирүүлсэн 1 хэрэг прокурорын хяналтын шатанд хянагдаж байна.
Боловсролын зээлийн сангийн үйл ажиллагаанд холбогдуулан мөрдөн шалгах ажиллагаа явуулж эхэлснээс хойш нийт 694 суралцагчаас 3,054,210 ам.долларын гадаад зээлийн эргэн төлөлт хийгджээ. Энэ нь одоогийн ханшаар 10.2 тэрбум төгрөгтэй тэнцэж байна.
Шударга мэдээ
Монгол, Швейцарын боловсролын салбарын хамтын ажиллагааны талаар санал солилцлоо
Боловсролын сайд Л.Энх-Амгалан Швейцарын Холбооны Улсын Гадаад хэргийн яамны Ази, Номхон далайн газрын дарга, сайд Маркус Лайтнерыг хүлээн авч уулзлаа.
Уулзалтын үеэр талууд Монгол, Швейцарын боловсролын салбарын хамтын ажиллагааны талаар санал солилцов.
Өнгөрсөн хугацаанд Швейцарын Холбооны Улстай тогтвортой хөгжлийн боловсрол, мэргэжлийн боловсрол, сургалтын чиглэлээр төсөл, хөтөлбөрүүдийг амжилттай хэрэгжүүлж ирснийг уулзалтын үеэр онцлон дурдлаа.
Цаашид мэргэжлийн боловсрол, сургалтын салбарт түлхүү хамтран ажиллах боломжийг эрэлхийлэхээр болов.
Мөн Швейцарын Холбооны Улсын хэрэгжүүлдэг хүртээмжтэй боловсролын бодлогоос туршлага судлах зэрэг чиглэлээр талууд санал солилцлоо.
