Авлигатай тэмцэх газрын Мөрдөн шалгах хэлтэс 2026 оны 8 дугаар сарын 17-23-ны өдрүүдэд гэмт хэргийн шинжтэй 50 гомдол, мэдээллийг шалгав. Үүнээс 7 гомдол, мэдээлэлд хэрэг бүртгэлтийн хэрэг нээх, 6 гомдол, мэдээлэлд хэрэг бүртгэлтийн хэрэг нээхээс татгалзах саналтайгаар прокурорт шилжүүлсэн бөгөөд одоогоор 37 гомдол, мэдээллийг хянан шалгаж байна.

Түүнчлэн эрүүгийн 1059 хэрэгт мөрдөн байцаалтын ажиллагаа явуулснаас 11 хэргийг шүүхэд шилжүүлэх, 4 хэргийг хаах саналтай прокурорт хүргүүлж, 2 хэргийг нэгтгэн шалгаж байна. Мөрдөн шалгах ажиллагаанд одоогоор 1042 хэрэг шалгагдаж байна. Хэрэг бүртгэлтийн 1 хэрэгт 14 объектод нэгжлэгийн ажиллагаа явуулав.

• Замын-Үүд дэх Гаалийн газрын гаалийн улсын байцаагч Ж.О нь албаны чиг үүргээ хэрэгжүүлсний хариуд бусдаас удаа дараа хахууль авсан,
• Замын-Үүд дэх Гаалийн газрын гаалийн улсын байцаагч Л.Э нь албаны чиг үүргээ хэрэгжүүлсний хариуд бусдаас удаа дараа хахууль авсан, хахууль авах гэмт хэрэгт хамжигчаар хамтран оролцсон,
• Нийтийн албан тушаалтан А.Б нь хяналт шалгалт явуулахдаа хахууль өгөгчийн ашиг сонирхлын үүднээс албаны чиг үүргээ хэрэгжүүлэхгүй байхын тулд хахууль авсан,
• Удирдах албан тушаалтан Г.С нь албан үүрэг, бүрэн эрх, албан тушаалын байдлаа урвуулан ашиглаж бусдад давуу байдал олгосны улмаас төрийн байгууллагад 145,2 сая төгрөгийн хохирол учруулсан гэх хэргийн мөрдөн шалгах ажиллагааг дуусгаж, шүүхэд шилжүүлэх саналтайгаар прокурорт хүргүүлэв гэж АТГ-аас мэдээллээ. 

2022 онд бүс нутгийн төвүүдийн санаачилгаар “Олон улсын хог хаягдалгүй хотуудын сүлжээ”-г байгуулсан бөгөөд энэхүү сүлжээ нь хотуудын хог хаягдлыг бууруулах, дахин ашиглах, дахин боловсруулах тогтолцоог хөгжүүлэх, шилдэг туршлага солилцох, бодлогын уялдаа холбоог сайжруулах, олон улсын хамтын ажиллагааг бэхжүүлэх зорилготой. 2026 оны байдлаар 28 улсын 116 хотууд тус сүлжээнд нэгдсэн байна.

Монгол Улсаас Улаанбаатар, Дархан, Эрдэнэт, Хархорин хотууд, Завхан, Төв болон Хэнтий аймаг “Олон улсын хог хаягдалгүй хотуудын сүлжээ”-нд нэгдэж гэрчилгээгээ гардан авлаа.

“Байгаль орчны асуудал өнөөдөр нэг улс, нэг байгууллага дангаараа шийддэг асуудал биш. Уур амьсгалын өөрчлөлт, биологийн олон янз байдлын алдагдал, газрын доройтол, химийн бодис, хог хаягдал гээд бүгд холбоотой. Байгаль орчин, уур амьсгалын өөрчлөлтийн яам яам эдгээр асуудлаар Монгол Улсын нэгдэн орсон олон улсын гэрээ, конвенцуудын хэрэгжилтийг хариуцан ажилладаг.

Үүний дотор Базел, Роттердам, Стокгольм, Минамата, Венийн конвенц болон Монреалын протокол багтдаг. Өнөөдөр энд нэг чухал асуудал дээр төвлөрч байна. Энэ бол хог хаягдлыг зүгээр нэг устгах биш, хог болохоос нь өмнө багасгах, дахин ашиглах, дахин боловсруулах тогтолцоонд шилжих асуудал юм” хэмээн БОУАӨЯ-ны Төрийн нарийн бичгийн дарга Ш.Батбаяр ёслолын ажиллагааг нээж хэлсэн үгэндээ онцлов.

Дэлхийд үүнийг хийж чадсан бодит жишээ бий. Словенийн нийслэл Любляна 2014 онд Европын Холбооны нийслэлүүдээс анх “Zero Waste” зорилго тавьсан. Өнөөдөр тус хот ахуйн хог хаягдлынхаа 70 орчим хувийг тусад нь ангилан цуглуулдаг болсон. Энэ жишээний гол санаа нь ганц технологид биш, хотын захиргаа, иргэд, аж ахуйн нэгжүүд нэг тогтолцоогоор ажилласанд байгаа гэдгийг мөн тэр бээр жишээ болгон тодотгов.

2025 онд зөвхөн Улаанбаатар хотод 1.83 сая тонн хог хаягдал үүссэн. Үүний 16.3 хувь нь хуванцар хаягдал байна. Нөгөө талд хотын хэмжээнд 1000 гаруй ангилан ялгах цэг ажиллаж байна. Өөрөөр хэлбэл, бид тэгээс эхлэхгүй. Суурь нь байна. Харин одоо энэ ажлыг илүү нэгдсэн систем болгох хэрэгтэй гэдгийг онцоллоо гэж Байгаль орчин, уур амьсгалын өөрчлөлтийн яамнаас мэдээллээ. 

2026 оны наймдугаар сарын 25-ны 08 цагаас 20 цаг хүртэл: Нутгийн баруун хэсгээр үүлшиж, Баян-Өлгий, Ховдын нутгаар бага зэргийн бороо орно.  Бусад нутгаар багавтар үүлтэй,бороо орохгүй. Салхи нийт нутгаар баруунаас секундэд 6-11  метр.

Монгол-Алтай, Хэнтийн уулархаг нутгаар 15-20 хэм, Их нууруудын хотгор болон говийн бүс нутгийн өмнөд хэсгээр 26-31 хэм, бусад нутгаар 20-25 хэм дулаан байна.

УЛААНБААТАР ХОТ ОРЧМООР: Багавтар үүлтэй. Бороо орохгүй. Салхи баруунаас секундэд 4-9  метр. 22-24  хэм дулаан байна. 

БАГАНУУР ОРЧМООР: Багавтар үүлтэй. Бороо орохгүй. Салхи баруунаас секундэд 4-9  метр. 22-24  хэм дулаан байна. 

ТЭРЭЛЖ ОРЧМООР: Багавтар үүлтэй. Бороо орохгүй. Салхи баруунаас секундэд 3-8  метр. 20-22  хэм дулаан байна. 

2026 оны наймдугаар сарын 26-наас
2026 оны наймдугаар сарын 30-ныг хүртэлх 
цаг агаарын урьдчилсан төлөв

26-нд баруун аймгуудын нутгийн зарим газар, төвийн аймгуудын нутгийн баруун хэсгээр, 27-нд баруун болон төвийн аймгуудын нутгийн зарим газар болон говийн аймгуудын нутгийн хойд хэсгээр, 28-нд төв, зүүн аймгуудын ихэнх нутаг болон говийн аймгуудын нутгийн зүүн хэсгээр, 29-нд төвийн аймгуудын нутгийн зүүн хэсэг болон зүүн аймгуудын ихэнх нутгаар бороо, дуу цахилгаантай аадар бороо орно. Салхи ихэнх хугацаанд секундэд 4-9 метр, нутгийн зарим газраар борооны өмнө түр зуур ширүүснэ. 27-нд нутгийн хойд хэсгээр, 28-нд ихэнх нутгаар, 29-нд нутгийн зүүн хэсгээр сэрүүсэж, Алтай, Хангай, Хөвсгөл, Хэнтийн уулархаг нутаг, Завхан, Заг, Байдраг голын эх, Хүрэнбэлчир орчим, Идэр, Тэс, Туул, Тэрэлж голын хөндийгөөр шөнөдөө 1 хэм хүйтнээс 4 хэм, өдөртөө 11-16 хэм, говийн бүс нутгийн өмнөд хэсгээр шөнөдөө 11-16  хэм, өдөртөө 23-28 хэм, бусад нутгаар шөнөдөө 4-9  хэм, өдөртөө 16-21 хэм дулаан байна.