Урлаг спорт
ДАШТ-ээс медаль хүртсэн боксчдыг хүлээн авч уулзав
Боксын эмэгтэйчүүдийн ДАШТ-д манай тамирчид амжилттай оролцож, түүхэндээ анх удаа хос медальтай ирсэн. Тухайлбал, 48 кг-д “Аврагч” спорт хорооны тамирчин Л.Алтанцэцэг мөнгөн медаль, 54 кг-д “Алдар” спорт хорооны тамирчин М.Энхжаргал хүрэл медаль хүртсэн билээ.
МҮОХ-ны Ерөнхийлөгч Б.Баттүшиг медаль хүртсэн тамирчдыг дасгалжуулагчдын хамт Олимпик хауст хүлээн авч уулзлаа. Энэ үеэр тамирчдыг МҮОХ-ны "Алтан Очир" одон, мөнгөн шагналаар, дасгалжуулагчдыг мөнгөн шагналаар шагнаж урамшуулав.
Уулзалтад МҮОХ-ны Тэргүүн дэд ерөнхийлөгч Ч.Наранбаатар, Гүйцэтгэх зөвлөлийн гишүүн П.Буяндэлгэр, Тамирчдын комиссын дарга Д.Отгондалай болон шигшээ багийн ахлах дасгалжуулагч Ж.Энхтөр, шигшээ багийн дасгалжуулагч Ж.Еркин, тамирчдын сэтгэлзүйч Б.Золзаяа нар байлцав.
МҮОХ-ны Ерөнхийлөгч Б.Баттүшиг өндөр амжилт гаргасан тамирчдад баяр хүргэхийн зэрэгцээ дараа дараагийн тэмцээндээ амжилттай оролцохыг хүсэв. Мөн эмэгтэй тамирчдаа дэмжиж, ивээн тэтгэх байгууллага олж өгөх чиглэлд хамтран ажиллахаар санал солилцлоо.
Ахлах дасгалжуулагч Ж.Энхтөр энэ жилийн ДАШТ-ий шагналын сан өндөр байсан болохоор шилдэг тамирчид бүгд ирснийг онцолж, олимпын эрх олгох чухал тэмцээнүүд манай тамирчдыг хүлээж байгааг хэлэв.
ДАШТ-ий мөнгөн медалийн эзэн Л.Алтанцэцэг “Миний хувьд тав дахь ДАШТ-дээ оролцоод медаль авлаа. Өмнө нь 2016 онд медалийн төлөө өрсөлдөөд ялагдаж байсан. Тэр үеэс хойш дэлхийгээс медаль авах боломжтой юм байна гэдгээ мэдэрсэн. Одоо биднийг Азийн наадам гэсэн маш чухал тэмцээн хүлээж байна. Энэ тэмцээнээс Парисын олимпын эрх олгоно. Азийн наадамд амжилттай оролцож, олимпын эрхээ авахыг хүсэж байна” гэв.
Түүнчлэн хүрэл медалийн эзэн М.Энхжаргал “Би анхны ДАШТ-дээ ороод медаль хүртсэндээ маш их баяртай байна. ДАШТ-ий бэлтгэлд гараад байхад медаль их л ойрхон юм шиг санагдаад байсан. Анхны тулаануудаа хийгээд эхлэхээр надад боломж байгаа гэдэгт улам итгэлтэй болсон. Одоо ингээд дэлхийн медальт тамирчин болсон учраас цаашаа илүү хичээх ёстой гэдгээ ойлгож байгаа” хэмээн ярилаа.
Урлаг спорт
С.Жамбалжамц Азийн наадмаас хүрэл медаль хүртлээ
Монголын дугуйчин, ОУХМ С.Жамбалжамц “Айчи–Нагояа 2026” Азийн зуны XX наадмын засмал замын дугуйн эрэгтэйчүүдийн ганцаарчилсан цуваа гараатай уралдаанаас хүрэл медаль хүртлээ. Энэ нь Монголын багийн тус наадмаас хүртсэн анхны медаль болж байна.
С.Жамбалжамц замаа 42 минут 58.06 секундэд туулжээ. Казахстаны Алексей Луценко 41:24.05 амжилтаар түрүүлж, Японы Имамура Шүнсүкэ 42:58.04 амжилтаар мөнгөн медаль хүртсэн байна. Монголын тамирчин мөнгөн медалиас ердөө 0.02 секундээр хоцорчээ.
Ийнхүү С.Жамбалжамц Азийн наадмаас хоёр дахь хүрэл медалиа хүртэв. Тэрбээр өмнөх Ханжоугийн Азийн наадамд мөн хүрэл медаль хүртэж байсан юм.
“Айчи–Нагояа 2026” Азийн наадмын засмал замын дугуйн эрэгтэйчүүдийн бөөн гараатай уралдаан есдүгээр сарын 23-нд болно. Харин эмэгтэйчүүдийн бөөн гараатай уралдаан есдүгээр сарын 22-нд зохион байгуулагдахаар албан ёсны хуваарьт тусгажээ.
Урлаг спорт
Дүнжингарав, Нарантуул худалдааны төвөөр үйлчлүүлэх иргэдэд богино эргэлтийн автобус үнэ төлбөргүй үйлчилнэ
Цөлжилттэй тэмцэх олон улсын COP17 хурал энэ сарын 17-нд Улаанбаатар хотод эхлэх гэж байна. Энэ хуралд дэлхийн 196 орны зочид төлөөлөгчид оролцох бөгөөд авто замын ачааллыг бууруулах үүднээс Дүнжингарав, Нарантуул захын авто машины зогсоолыг түр хугацаанд хаана.
Тус худалдааны төвөөр үйлчлүүлэх иргэдэд богино эргэлтийн автобус үнэ төлбөргүй үйлчлэхээр болсон Иймд 2026 оны наймдугаар сарын 17-ны өдрийн 06:00 цаг хүртэл үргэлжилэх бөгөөд тус маршрут нь
Офицеруудын ордоноос -Нарантуул-Дүнжингарав худалдааны төв хүртэлх хамаарна гэж Нийтийн тээврийн бодлогын газраас мэдээллээ.
Урлаг спорт
Улаанбаатарт өдөртөө 25 хэм дулаан
Малчид, иргэд, аялагчид, тээвэрчдэд зориулсан мэдээ: 11-нд уулархаг нутгаар бороо, дуу цахилгаантай аадар бороо орно.
2026 оны наймдугаар сарын 11-ний 08 цагаас 20 цаг хүртэл: Ихэнх нутгаар солигдмол үүлтэй. Хэнтийн уулархаг нутаг, говийн бүс нутгийн зүүн өмнөд хэсэг, Дарьгангын тал нутгаар бороо, дуу цахилгаантай аадар бороо орно. Салхи нутгийн баруун хэсгээр баруун өмнөөс, бусад нутгаар баруун хойноос секундэд 4-9 метр, нутгийн зарим газраар борооны өмнө түр зуур ширүүснэ. Хөвсгөл, Хэнтийн уулархаг нутаг, Тэрэлж, Хэрлэн голын хөндийгөөр 19-24 хэм, Их нууруудын хотгор, Алтайн өвөр говиор 29-34 хэм, бусад нутгаар 23-28 хэм дулаан байна.
УЛААНБААТАР ХОТ ОРЧМООР: Үүлшинэ. Бороо орохгүй. Салхи баруун хойноос секундэд 4-9 метр. 23-25 хэм дулаан байна.
БАГАНУУР ОРЧМООР: Үүлшинэ. Бороо орохгүй. Салхи баруун хойноос секундэд 4-9 метр. 22-24 хэм дулаан байна.
ТЭРЭЛЖ ОРЧМООР: Үүлшинэ. Бороо орохгүй. Салхи баруун хойноос секундэд 3-8 метр. 21-23 хэм дулаан байна.
2026 оны наймдугаар сарын 12-ноос
2026 оны наймдугаар сарын 16-ныг хүртэлх
цаг агаарын урьдчилсан төлөв
12-нд Монгол-Алтай, Хангай, Хөвсгөлийн уулархаг нутгаар, 13-нд баруун аймгуудын нутгийн зарим газар, төвийн аймгуудын нутгийн баруун болон хойд хэсгээр, 14-нд баруун аймгуудын нутгийн зүүн, төв болон зүүн аймгуудын нутгийн хойд хэсэг, говийн аймгуудын нутгийн зарим газраар, 15-нд нутгийн зарим газраар бороо, дуу цахилгаантай аадар бороо орно. Салхи ихэнх хугацаанд секундэд 5-10 метр, нутгийн зарим газраар борооны өмнө түр зуур ширүүснэ. Шөнөдөө Алтай, Хангай, Хөвсгөлийн уулархаг нутаг, Завхан, Заг, Байдраг голын эх, Хүрэнбэлчир орчим, Идэр, Тэс, Туул, Тэрэлж, Хэрлэн голын хөндийгөөр 3-8 хэм, Их нууруудын хотгор, говийн бүс нутгийн өмнөд хэсгээр 15-20 хэм, бусад нутгаар 9-14 хэм, өдөртөө Монгол-Алтай, Хангай, Хөвсгөл, Хэнтийн уулархаг нутаг, Эг, Үүр, Туул, Тэрэлж, Хэрлэн голын хөндийгөөр 20-25 хэм, Их нууруудын хотгор, говийн бүс нутгийн өмнөд хэсгээр 30-35 хэм, бусад нутгаар 25-30 хэм дулаан байна. 13-наас нутгийн хойд хэсгээр бага зэрэг сэрүүснэ.
-
Улстөр нийгэм2025/10/20
Монгол Улсын Ерөнхийлөгч У.Хүрэлсүх УИХ-ын 2025 оны 95 дугаар тогтоолд бүхэлд нь...
-
Улстөр нийгэм2022/01/10
Шадар сайд С.Амарсайхан Замын-Үүдийн ажлын хэсгийг ахалж ажиллана
-
Цаг үе2023/02/03
Улаанбаатарт өдөртөө 11 хэм хүйтэн
-
Улстөр нийгэм2020/05/01
УИХ: Үндсэн хуулийн цэцийн 02 дугаар дүгнэлтийг хүлээн зөвшөөрөх боломжгүй гэж ү...