Цаг үе
Авлигатай тэмцэх газрын хамт олон Хүүхдийн төв сувилалд нярайн шарлагын аппарат хандивлав
Авлигатай тэмцэх газрын хамт олон цар тахалтай энэ цаг үед сайн үйлсийн аянд нэгдэж, Хүүхдийн төв сувилалд нярайн шарлагын 8 аппарат хандивлав.
Авлигатай тэмцэх газрын Тамгын хэлтсийн дарга, эрхэлсэн комиссар З.Баасанням БНХАУ-ын эрүүл мэндийн тоног төхөөрөмжийн “Heal Force Bio-meditech” компанид үйлдвэрлэсэн GLQ-1L загварын, хамгийн сүүлийн үеийн, нярайд нэн шаардлагатай 8 ширхэг шарлагын аппаратыг Хүүхдийн төв сувилалд өнөөдөр хүлээлгэн өгөв.
Тэрээр хэлэхдээ “Манай хамт олон өөрсдийн санаачилгаар сайн үйлсийн аянд жил бүр нэгдэж, бодитой ажил зохион байгуулдаг. Бид энэ удаагийн сайн үйлсийн аянаа Ковид-19 цар тахлын үед нярай хүүхдүүдэд зориулж байна. Гэр бүлийн хүчирхийлэл, архины хамааралтай гэр бүлийн болон гээгдсэн, олдсон, эцэг эх нь тодорхойгүй, харж хандах хүнгүй, сульдаатай, амин дэмийн дутагдалтай, суурь өвчтэй нярайн ганц сувилал болох Хүүхдийн төв сувилалд нэн шаардлагатай байгаа шарлагын аппаратыг хандивлахаар шийдвэрлэсэн юм. Монголын бүх үрс халуун дулаан гэр бүлд, элэг бүтэн эрүүл саруул өсөн торниж байхыг ерөөе” гэв.
Хүүхдийн төв сувиллын захирал Д.Оюунцэцэг “Дөнгөж төрсөн нярайн элэгний шүүх үйл ажиллагаа бүрэн хөгжөөгүй байдгаас цусан дахь билирубиныг бүрэн шүүж чадахгүй, шарлалт үүсдэг. Шарлалт гүнзгийрвэл тархи, мэдрэлийн тогтолцоог гэмтээх аюултай. Манай байгууллага өнчин, хагас өнчин, бага жинтэй, эцэг эх нь тодорхойгүй, суурь өвчтэй хүүхдийг гурван нас хүртэл нь эмчлэн сувилах, сургалт хүмүүжлийн үйлчилгээг 24 цагаар үзүүлдэг. Ийм хүүхдүүдэд халуун гараа сунган тусалж, эмчилгээний маш чухал шаардлагатай 8 ширхэг аппарат бэлэглэсэн Авлигатай тэмцэх газрын удирдлага, хамт олонд маш их баярлалаа” гэж хэлэв. Хүүхдийн төв сувилалд нярайн шарлагын 2 аппарат ажилладаг бөгөөд Авлигатай тэмцэх газрын хамт олны хандивыг хүлээн авснаар 10 аппараттай болж байгаа юм байна.
Нярайн шарлалтыг эмчлэх аппарат хандивлах арга хэмжээнд “Мед импорт Монгол” ХХК-ийн гүйцэтгэх захирал Б.Алтангэрэл, маркетингийн менежер М.Баярмагнай нарын хүмүүс оролцлоо. 10 мянган цаг тасралтгүй ажиллах хүчин чадалтай, 19.5 сая төгрөгийн үнэ өртөг бүхий, чанарын баталгаатай эдгээр аппаратыг импортоор оруулж ирсэн “Мед импорт Монгол” компани нийгмийн хариуцлагын хүрээнд хийж буй уг хүмүүнлэгийн арга хэмжээг дэмжин ажиллажээ. Тус компаниас тодорхой хэмжээний үнийн хөнгөлөлт үзүүлсэн бөгөөд энэ үеэр тэд нярайн халууныг зайнаас хэмжигч 5 ширхэг багаж мөн хандивлалаа. “Мед импорт Монгол” ХХК өөрсдийн нийлүүлсэн тоног төхөөрөмжиндөө байнгын засвар үйлчилгээг тогтмол хийдэг учир Авлигатай тэмцэх газар сонгосон ажээ.
Цаг үе
АНУ, Иран харилцан цэргийн ажиллагаагаа түр зогсоосны дараа газрын тосны үнэ 7 орчим хувиар буурлаа
АНУ, Иран харилцан цэргийн ажиллагаагаа түр зогсоосны дараа олон улсын зах зээлд газрын тосны үнэ огцом буурлаа. Зах зээл Ойрх Дорнод дахь нөхцөл байдал намжиж, газрын тосны нийлүүлэлт тасалдах эрсдэл буурна гэж үнэлсэн нь үүнд голлон нөлөөлжээ.
Америкийн зүүн эргийн цагаар долоодугаар сарын 26-ны өдрийн 18:43 цагийн байдлаар Нью-Йоркийн барааны биржид есдүгээр сард нийлүүлэх АНУ-ын хөнгөн түүхий газрын тосны фьючерсийн үнэ баррель нь 83.10 ам.доллар болж, өмнөх арилжаанаас 6.21 ам.доллар буюу 6.95 хувиар буурсан байна.
Мөн Лондонгийн ICE биржид есдүгээр сард нийлүүлэх Брент төрлийн түүхий газрын тосны фьючерсийн үнэ баррель нь 89.58 ам.доллар болж, 7.20 ам.доллар буюу 7.44 хувиар унажээ.
Газрын тосны нийлүүлэлтэд учирч болзошгүй эрсдэл буурсан гэсэн хүлээлтийн нөлөөгөөр АНУ-ын хөрөнгийн индексийн фьючерсүүд өссөн байна.
Axios агентлагийн мэдээлснээр, АНУ-ын Ерөнхийлөгч Дональд Трамп долоодугаар сарын 24-нд Ираны эсрэг цэргийн цохилтыг түр зогсоох шийдвэр гаргажээ. Үүний дараа Reuters агентлаг Ираны эх сурвалжаас эш татан мэдээлэхдээ, АНУ цэргийн ажиллагаагаа үргэлжлүүлэхгүй бол Иран мөн хариу ажиллагаагаа зогсооход бэлэн байгаа ч Вашингтоны байр сууринд бүрэн итгэлгүй хэвээр байгааг онцолсон байна.
АНУ энэ сарын эхээр Ираныг Ормузын хоолойгоор дамжин өнгөрч буй худалдааны хөлөг онгоцнуудад халдсан гэж буруутган цэргийн ажиллагаа явуулж эхэлсэн юм. Үүний улмаас дэлхийн газрын тосны нийлүүлэлт тасалдаж болзошгүй гэсэн болгоомжлол нэмэгдэж, сүүлийн долоо хоногуудад газрын тосны үнэ өсөөд байсан билээ.
Цаг үе
BRT төслийн нарийвчилсан зураг төслийн тендерийн үнэлгээ үргэлжилж байна
Улаанбаатар хотод 2025-2030 онд хэрэгжүүлэхээр төлөвлөсөн "Тусгай замын автобус" (BRT) төслийн нарийвчилсан зураг төсөл боловсруулах зөвлөх үйлчилгээний тендерийн үнэлгээ үргэлжилж байна.
Төслийн хүрээнд урьдчилсан судалгаа, замын хөдөлгөөний ачааллын шинжилгээ, техник, эдийн засгийн үндэслэл, төслийн үзэл баримтлал, санхүүжилтийн бүтэц, хэрэгжилтийн үе шатны төлөвлөлт зэрэг суурь ажлыг бүрэн дуусгажээ.
Одоогоор инженерийн нарийвчилсан зураг төсөл, барилгын ажлын хяналт, үйл ажиллагааны нарийвчилсан төлөвлөгөө боловсруулах хоёр багц зөвлөх үйлчилгээний тендерийг Азийн хөгжлийн банкны журмын дагуу 2026 оны тавдугаар сарын 14-нд олон улсад зарласан байна.
Тендерт оролцогчдын саналыг зургаадугаар сарын 10 хүртэл хүлээн авч, одоо техникийн болон санхүүгийн үнэлгээ хийж, богино жагсаалт гарган хоёрдугаар шатны сонгон шалгаруулалтыг эхлүүлэхээр бэлтгэж байгаа аж. Энэхүү сонгон шалгаруулалтад гадаад, дотоодын хамтарсан 23 байгууллага материалаа ирүүлжээ.
Сонгон шалгаруулалт дууссаны дараа төслийн инженерийн нарийвчилсан шийдэл, иж бүрэн зураг төслийг боловсруулах байгууллагыг тодруулж, барилга угсралтын ажлыг эхлүүлэх боломж бүрдэх юм.
BRT систем нь автобусанд зориулсан тусгай эгнээг авто замын гуравдугаар эгнээнд төлөвлөснөөр уулзвар дээр бусад тээврийн хэрэгслийн хөдөлгөөнд саад учруулахгүйгээр нийтийн тээврийг зорчуулах шийдэлтэй. Мөн автобуснууд ухаалаг гэрлэн дохионы системээр уулзварыг давуу эрхтэй нэвтрэх боломжтой тул хөдөлгөөний хурд, цагийн нарийвчлал сайжрахыг судалгаанд дурджээ.
Төсөл хэрэгжсэнээр оргил ачааллын үеийн автобусны дундаж хурд одоогийн 5-8 км/цаг-аас 20-25 км/цаг хүртэл буюу 4-5 дахин нэмэгдэх тооцоо гарсан байна. Ингэснээр иргэдийн зорчих хугацаа богиносож, нийтийн тээврийн үйлчилгээ илүү тогтвортой, цагийн хуваарийн дагуу ажиллах нөхцөл бүрдэхээр байгааг албаныхан онцоллоо.
Цаг үе
Шүлхий өвчний SAT-1 хэвшлийн эсрэг нэмэлт дархлаажуулалт эхэллээ
Монгол Улсад өмнө нь бүртгэгдээгүй шүлхий өвчний SAT-1 хэвшил өнгөрсөн тавдугаар сард Баян-Өлгий, Ховд аймагт анх удаа бүртгэгдэж, лабораторийн шинжилгээгээр батлагдсан.
Үүнтэй холбогдуулан Засгийн газар, Улсын онцгой комисс, Хүнс, хөдөө аж ахуй, хөнгөн үйлдвэрийн яам, Мал эмнэлгийн ерөнхий газар хамтран халдварыг хязгаарлах, өвчилсөн малыг устгах, голомтын болон хязгаарлалтын бүсийн малыг дархлаажуулах зэрэг шуурхай арга хэмжээг хэрэгжүүлжээ.
Энэ хүрээнд БНХАУ-аас 1.65 сая тун SAT-1 хэвшлийн вакцин нийлүүлж, Баян-Өлгий, Ховд, Говь-Алтай аймгийн нийт 2.5 сая толгой малыг дархлаажуулснаар өвчний тархалтыг хязгаарлан хяналтад аваад байна.
Мөн ОХУ-ын Мал, амьтны эрүүл мэндийг хамгаалах холбооны улсын төвөөс үйлдвэрлэсэн О болон SAT-1 хэвшлийн шүлхий өвчний эсрэг 2.0 сая тун вакцин энэ сарын 25-ны өдөр Улаанбаатар хотод хүлээн авчээ.
Вакциныг тусгай зориулалтын хөргүүртэй тээврийн хэрэгслээр долоодугаар сарын 25-27-ны өдрүүдэд орон нутагт бүрэн хүргэж, Мал эмнэлгийн ерөнхий газрын даргын тушаалын дагуу өнөөдөр буюу долоодугаар сарын 27-ноос нэмэлт дархлаажуулалтыг эхлүүлсэн байна.
Нэмэлт дархлаажуулалтад эрсдэлтэй бүсийн 2.3 сая гаруй толгой мал хамрагдах бөгөөд үүнд:
- Баян-Өлгий аймгийн дөрвөн сумын 683.7 мянган толгой мал,
- Ховд аймгийн найман сумын 1.0 сая толгой мал,
- Говь-Алтай аймгийн 110.0 мянган толгой үхэр,
- Увс аймгийн 283.3 мянган толгой үхэр,
- Завхан аймгийн 284.4 мянган толгой үхэр багтаж байна.
Хүнс, хөдөө аж ахуй, хөнгөн үйлдвэрийн яамнаас энэхүү арга хэмжээ нь Монгол Улсад анх бүртгэгдсэн SAT-1 хэвшлийн шүлхий өвчний тархалтыг бүрэн хязгаарлах, халдварын эрсдэлийг бууруулах, малын эрүүл мэндийг хамгаалах, мал аж ахуйн үйлдвэрлэлийн тогтвортой байдлыг хангахад чухал ач холбогдолтойг онцолжээ.
Мөн Мал эмнэлгийн ерөнхий газраас малчид, мал бүхий иргэдийг дархлаажуулалтад идэвхтэй хамрагдаж, малын шилжилт хөдөлгөөний хязгаарлалт, хорио цээр, биоаюулгүй байдлын дэглэмийг чанд мөрдөн ажиллахыг уриаллаа.
